ក្រសួងអប់រំ និងក្រុមហ៊ុន Smart Axiata សហការរៀបចំសិក្ខាសាលាស្តីពីអក្ខរកម្មឌីជីថល ជូនដល់សិស្សានុសិស្សក្នុងខេត្តកំពង់ចាម
ភ្នំពេញ៖ យុវជនចំនួន៣៦០នាក់ មកពីវិទ្យាល័យសំបួរមាស វិទ្យាល័យសម្តេចតេជោ ហ៊ុន សែន បឹងកុក វិទ្យាល័យដីដុះ វិទ្យាល័យ ហ៊ុន សែន កំពង់ចាម បានចូលរួមសិក្ខាសាលាស្ដីពីអក្ខរកម្មឌីជីថល ដោយផ្ទាល់ និងតាមអនឡាញ រយៈពេលពីរថ្ងៃ ចាប់ពីថ្ងៃទី២០-២១ ខែសីហា ឆ្នាំ២០២២ ដែលសហការរៀបចំឡើងដោយក្រសួងអប់រំ យុវជន និងកីឡា និងក្រុមហ៊ុន Smart Axiata ។
សិក្ខាសាលានេះ ផ្តល់ឱ្យយុវជនមានឱកាសទទួលបានចំណេះដឹងអំពីមូលដ្ឋានគ្រឹះនៃអក្ខរកម្មឌីជីថល ដែលអាចឱ្យពួកគេយកទៅប្រើប្រាស់ ដើម្បីផ្តល់ជាប្រយោជន៍ដល់ការសិក្សា និងការប្រកបការងារ។
កិច្ចសហការរួមគ្នានេះ បញ្ជាក់សារជាថ្មីនូវការប្តេជ្ញាចិត្តរបស់ក្រុមហ៊ុន Smart Axiata ក្នុងការជួយជំរុញចក្ខុវិស័យឌីជីថលរបស់កម្ពុជា តាមរយៈកម្មវិធីបំប៉នជំនាញ និងចំណេះដឹងសំខាន់ៗដល់ប្រជាជនកម្ពុជាជំនាន់ក្រោយ ដើម្បីជួយជំរុញសេដ្ឋកិច្ចឌីជីថល ៕
