លោកជំទាវ ឡោក ខេង អញ្ជើញទស្សនកិច្ច មន្ទីរពេទ្យសកលវិទ្យាល័យជាតិសេអ៊ូល និងមជ្ឈមណ្ឌលប្រពន្ធ័ព័ត៌មាន នៅទីក្រុងសេអ៊ូល

ភ្នំពេញ៖ លោកជំទាវ ឡោក ខេង ប្រធានគណៈកម្មការសុខាភិបាល សង្គមកិច្ច អតីតយុទ្ធជន យុវនីតិសម្បទា ការងារ បណ្តុះបណ្តាលវិជ្ជាជីវៈ និងកិច្ចការនារី នៃរដ្ឋសភា នាថ្ងៃ២៥ ខែសីហា ឆ្នាំ២០២២ បានអញ្ជើញទៅទស្សន:កិច្ចសិក្សា នៅមន្ទីរពេទ្យសកលវិទ្យាល័យជាតិសេអ៊ូល ស្តីអំពីរបបគំហើញថ្មីៗ នៃការព្យបាលជំងឺតាម សញ្ញាសិប្បនិម្មិត អេអាយ (AI) និងមជ្ឈមណ្ឌលប្រពន្ធ័ព័ត៌មានស្តីពី ការគ្រប់គ្រង របបសន្តិសុខសង្គម ដើម្បីសុវត្ថិភាពសុខភាព ដែលគ្រប់គ្រងតាមប្រពន្ធ័ទំនើប ដើម្បីស្វែងយល់ពីការគ្រប់គ្រង ការពិគ្រោះ ការព្យាបាល ការផលិតថ្នាំ និងវ៉ាក់សាំង ដើម្បីលើកកម្ពស់សុខភាពសាធារណ: ។

តមករសៀលថ្ងៃដដែល លោកជំទាវ ឡោក ខេង បានអញ្ជើញចូលរួមប្រជុំស្តាប់បទបង្ហាញនៃក្រុមហ៊ុន ធំចំនួន៤ ដែលជាដៃគូរបស់មន្ទីរពេទ្យជាតិកូរ៉េ លើការបំពាក់គ្រឿងសម្ភារ:បរិក្ខាពេទ្យទំនើបៗ ដែលមានបច្ចេកវិជ្ជាខ្ពស់ ដើម្បីពិនិត្យព្យាបាល និងគ្រប់គ្រង ចែករំលែកនូវប្រពន្ធ័ព័ត៌មានស្តីពីសុខភាព ។

ជាមួយគ្នានេះដែរ មុនបញ្ចប់កិច្ចប្រជុំវេទិកាអាស៊ី-ប៉ាស៊ីហ្វិក លើកទី៦ (APPFGH6) ស្តីពីសុខភាពសកល លោកជំទាវ ឡោក ខេង បានថ្លែងអំណរគុណយ៉ាងជ្រាលជ្រៅដល់ រដ្ឋសភានៃសាធារណ:រដ្ឋកូរ៉េ ដែលជាប្រធាន នៃ វេទិកាសភាអាស៊ីប៉ាស៊ីហ្វិក និងអង្គការសុខភាពពិភព លោកប្រចាំតំបន់អាស៊ីប៉ាស៊ីហ្វិកខាងលិច ដែលបានរៀបចំកិច្ចប្រជុំដ៏មានសារ:សំខាន់នេះឡើង និង បានសុំអោយប្រទេសកូរ៉េដែលជាប្រទេសមានកិច្ចសហការ ល្អជាមួយព្រះរាជាណាចក្រកម្ពុជាជួយជម្រុញការវិនិយោគលើកម្មវិធីសុខភាព តាមប្រពន្ធ័ អេអាយ (AI) ដូចនៅកូរ៉េដែលលោកជំទាវបានទៅទស្សនកិច្ចសិក្សា នៅពេលកូរ៉េជួយដល់ការសាងសង់មន្ទីរពេទ្យសកលវិទ្យាល័យនៅទីក្រុងភ្នំពេញនាពេលខាងមុខនេះផងដែរ ៕