លោក វ្ល៉ាឌីមៀ ពូទីន នៅថ្ងៃសៅរ៍ទី ២៧ ខែសីហា បានចុះហត្ថលេខាលើក្រឹត្យមួយ ស្តីពីអត្ថប្រយោជន៍ហិរញ្ញវត្ថុ
(មូស្គូ)៖ប្រធានាធិបតីរុស្ស៊ី លោក វ្ល៉ាឌីមៀ ពូទីន នៅថ្ងៃសៅរ៍ទី ២៧ ខែសីហា បានចុះហត្ថលេខាលើក្រឹត្យមួយ ស្តីពីអត្ថប្រយោជន៍ហិរញ្ញវត្ថុ សម្រាប់អ្នកដែលបានចាកចេញពីទឹកដីអ៊ុយក្រែន ហើយចូលទៅកាន់ប្រទេសរុស្ស៊ី រួមទាំងប្រាក់សោធននិវត្តន៍ ស្ត្រីមានផ្ទៃពោះ និងជនពិការ។
ក្រឹត្យនេះ បង្កើតការទូទាត់ប្រាក់សោធននិវត្តន៍ប្រចាំខែចំនួន ១០,០០០ រូប្លិ ឬត្រូវនឹង ១៧០ ដុល្លារអាម៉េរិក សម្រាប់មនុស្សដែលត្រូវបានបង្ខំឱ្យចាកចេញពីទឹកដីនៃប្រទេសអ៊ុយក្រែនចាប់តាំងពីថ្ងៃទី ១៨ ខែកុម្ភៈ។ ជនពិការក៏នឹងមានសិទ្ធិទទួលបានជំនួយប្រចាំខែដូចគ្នាដែរ ខណៈពេលដែលស្ត្រីមានផ្ទៃពោះ មានសិទ្ធិទទួលបានអត្ថប្រយោជន៍ធំមួយផ្សេងទៀត។
ក្រឹត្យនេះបង្ហាញថា អត្ថប្រយោជន៍ខាងលើនេះនឹងត្រូវផ្តល់ឱ្យដល់ពលរដ្ឋអ៊ុយក្រែន និងសាធារណរដ្ឋប្រជាមានិតដូណែត និងឡូហាន ដែលជាអង្គភាពបំបែកខ្លួនពីអ៊ុយក្រែនគាំទ្រដោយរុស្ស៊ីនៅភាគខាងកើតអ៊ុយក្រែន។
លើសពីនេះ ទីក្រុងមូស្គូបាននឹងកំពុងផ្តល់លិខិតឆ្លងដែនរុស្ស៊ីដល់ជនជាតិអ៊ុយក្រែន នៅក្នុងអ្វីដែលអ៊ុយក្រែន និងសហរដ្ឋអាម៉េរិកអះអាងថា មានបំណងកាត់បញ្ចូលទឹកដីដែលខ្លួនបានកាន់កាប់ ក្រោមកិច្ចខិតខំប្រឹងប្រែងខុសច្បាប់ និងជាផ្នែកមួយនៃចក្រពត្តិនិយមរុស្ស៊ីដណ្តើមយកទឹកដី។
ទីក្រុងមូ៉ស្គូបានគូសបញ្ជាក់ថា ខ្លួនកំពុងធ្វើ«ប្រតិបត្តិការយោធាពិសេស» ដើម្បីការពារខ្លួន និងការពារជនជាតិរុស្សីពីការធ្វើទុក្ខបុកម្នេញដោយអាជ្ញាធរអ៊ុយក្រែន។ យ៉ាងណាមិញ ទីក្រុងកៀវ និងប្រទេសលោកខាងលិច លើកឡើងថា វាគ្រាន់តែជាលេសដើម្បីចាប់ផ្តើមសង្គ្រាមដណ្តើមទឹកដីតាមបែបចក្រពត្តិ៕
