មេបញ្ជាការ កងពលតូចថ្មើរជើងលេខ៥២ អញ្ជើញធ្វើការអប់រំផ្សព្វផ្សាយសភាពការណ៍ថ្មីៗ ដល់នាយ-ពលទាហានចំណុះកងពល

ភ្នំពេញ៖ លោកឧត្តមសេនីយ៍ត្រី គុជ នាង មេបញ្ជាការកងពលតូចថ្មើរជើងលេខ៥២ នាថ្ងៃទី២៩ ខែសីហា ឆ្នាំ២០២២ បានអញ្ជើញធ្វើការត្រួតពិនិត្យកម្លាំង និងធ្វើការអប់រំចិត្តសាស្រ្ត ផ្សព្វផ្សាយសភាពការណ៍ថ្មីៗក្នុងសង្គមនាពេលបច្ចុប្បន្ន ដល់នាយទាហាន នាយទាហានរង ពលទាហាន នៅទីបញ្ជាការកងពលតូចថ្មើរជើងលេខ៥២ ស្ថិតនៅភូមិផ្លូវមាស ឃុំផ្លូវមាស ស្រុករតនមណ្ឌល ខេត្តបាត់ដំបង ។

ក្នុងឱកាសត្រួតពិនិត្យ និងផ្សព្វផ្សាយនេះដែរ៖ លោកឧត្តមសេនីយ៍ត្រី គុជ នាង មេបញ្ជាការ បានមានប្រសាសន៍លើកឡើងថា៖ ការអប់រំចិត្តសាស្រ្ត និងផ្សព្វផ្សាយនាឱកាសនេះ គឺដើម្បីឱ្យយល់ជ្រាបនូវតួនាទីភារកិច្ចរបស់នាយ-ពលទាហាន នៃកងយោធពលខេមរភូមិន្ទ ក៏ដូចជាការពង្រឹងនូវស្មារតីសតិអារម្មណ៍ និងយល់នូវការវិវត្តន៍នៃសភាពការណ៍ថ្មីៗ របស់សង្គមជាតិកើតមាននាពេលបច្ចុប្បន្ន។ លោកក៏បានបញ្ជាក់បន្ថែមទៀតថា កងកម្លាំងទាំងអស់ត្រូវគោរពអនុវត្តបទបញ្ជាតាមឋានានុក្រម ស្តាប់បទបញ្ជាមេបញ្ជាការរបស់ខ្លួនជាការចាំបាច់បំផុត ប៉ុន្តែបញ្ជានោះត្រូវប្រាកដថា ជាបញ្ជាដែលបម្រើដល់ជាតិមាតុភូមិ បម្រើប្រជាពលរដ្ឋប្រកបដោយមនសិការជាតិ មានឆន្ទៈមុះមុតស្មោះត្រង់ចំពោះជាតិ សាសនា ព្រះមហាក្សត្រ និងរាជរដ្ឋាភិបាលស្របច្បាប់ ។

លោកមេបញ្ជាការ បានក្រើនរំលឹកដល់នាយ-ពលទាហានទាំងអស់ ត្រូវជៀសឲ្យឆ្ងាយពីគ្រឿងញៀន និងត្រូវចូលរួមគោរពច្បាប់ចរាចរទាំងអស់គ្នា ព្រោះឃាតករទាំងពីរនេះ វាបានបំផ្លាញអាយុជីវិតមនុស្ស មិនរើសមុខ ព្រមទាំងទ្រព្យសម្បត្តិបងប្អូន ក្រុមគ្រួសារ និងសង្គមជាតិរបស់យើង។ ម៉្យាងវិញទៀត ប្រសិនបើគ្រឿងញៀនវាយលុកនៅក្នុងជួរកងទ័ព នោះវានឹងផ្ដល់គ្រោះថ្នាក់យ៉ាងខ្លាំង ដល់ប្រទេសជាតិរបស់យើង ។

សូមជម្រាបជូនថា ដោយអនុវត្តតាមបទបញ្ជារបស់ ឯកឧត្តមមេបញ្ជាការកងទ័ពជើងគោក និងមេបញ្ជាការយោធភូមិភាគទី៥ កងពលតូចថ្មើជើងលេខ៥២ បានធ្វើការចាត់តាំង ចុះអប់រំចិត្តសាស្រ្ត និងផ្សព្វផ្សាយសភាពការណ៍ថ្មីៗ ដល់នាយ-ពលទាហានគ្រប់បណ្ដាអង្គភាពចំណុះ និងកម្លាំងការពារតាមខ្សែរបន្ទាត់ព្រំដែនកម្ពុជា-ថៃផងដែរ ៕