ខេត្តរតនគិរីជាខេត្តទី៦ ដែលក្រសួងបរិស្ថាន ប្រារព្ធយុទ្ធនាការអន្ទាក់សូន្យ ដើម្បីទប់ស្កាត់អន្ទាក់ក្នុងតំបន់តំបន់ការពារធម្មជាតិ

ភ្នំពេញ៖ ខេត្តរតនគិរីដែលជាខេត្តទី៦ ដែលក្រសួងបរិស្ថាន រដ្ឋបាលខេត្តនិងអង្គការដៃគូប្រារព្ធយុទ្ធនាការអន្ទាក់សូន្យដើម្បីទប់ស្កាត់ អន្ទាក់ក្នុងតំបន់តំបន់ការពារធម្មជាតិ បង្កើនជម្រកសុវត្ថិភាពដល់សត្វព្រៃ។

ឯកឧត្តម នេត្រ ភក្ត្រា រដ្ឋលេខាធិការនិងជាប្រធានយុទ្ធនាការអន្ទាក់សូន្យ នៅរសៀលថ្ងៃទី៣ ខែកញ្ញា ឆ្នាំ២០២២ បានដឹកនាំធ្វើសន្និសីទសារព័ត៌មាននៅមន្ទីរបរិស្ថានខេត្តរតនគិរីដោយ មានការអញ្ជើញចូលរួមពីឯកឧត្តម ញែម សំអឿន អភិបាលនៃគណៈអភិបាលខេត្តរតនគិរី លោក ផុន ខេមរិន្ទ ប្រធានមន្ទីរបរិស្ថានខេត្តររនគិរី រួមនឹងអង្គការដៃគូរបស់ក្រសួងបរិស្ថានដែលធ្វើការងារអភិរក្សក្នុងនោះរួមមានអង្គការជីវិតធម្មជាតិ Nature Life អង្គការ WWF អង្គការ WEA អង្គការ CI អង្គការ FFI អង្គការសន្លំម្លប់ព្រៃ។

សន្និសីទសារព័ត៌មាននេះធ្វើឡើងដើម្បីជម្រាបជូនអ្នកសារព័ត៌មានជាតិនិងអន្តរជាតិអំពីគោលបំណងនៃការរៀបចំយុទ្ធនាការអន្ទាក់សូន្យផ្តួចផ្តើមនិងដឹកនាំដោយក្រសួងបរិស្ថាន មួយថ្ងៃមុនការរៀបចំយុទ្ធនាការអន្ទាក់សូន្យនាថ្ងៃទី៤ ខែកញ្ញា ឆ្នាំ២០២២ នៅលើទឹកដីខេត្តរតនគិរី។

ខេត្តរតនគិរីដែលជាខេត្តទី៦ ដែលក្រសួងបរិស្ថាន រដ្ឋបាលខេត្តនិងអង្គការដៃគូប្រារព្ធយុទ្ធនាការដើម្បីទប់ស្កាត់អន្ទាក់ក្នុងតំបន់តំបន់ការពារធម្មជាតិ បង្កើនជម្រកសុវត្ថិភាពដល់សត្វព្រៃ និងជីវៈចម្រុះ និងសុវត្ថិភាពដល់ភ្ញៀវទេសចរ និងពលរដ្ឋដែលចូលប្រមូលអនុផលព្រៃឈើ។ យុទ្ធនាការអន្ទាក់សូន្យនៅខេត្តរតនគិរីប្រារព្ធឡើងចំពេលពិភពលោកប្រារព្ធទិវាយល់ដឹងអំពីសត្វត្មាតពិភពលោក រំពឹងថានឹងមានការចូលរួមប្រមាណ ៥០០ នាក់៕