សាលាពលទាហានទី៤ បានទទួលថវិការ ដែលជាអំណោយឧបត្ថម្ភដ៏ថ្លៃថ្លា របស់ឧត្តមសេនីយ៍ឯក ហ៊ុន ម៉ាណែត និងលោកជំទាវ

ភ្នំពេញ៖ ឧត្តមសេនីយ៍ត្រី ជុយ សីហា មេបញ្ជាការរងយោធភូមិភាគទី៤ នៅថ្ងៃទី៦ ខែកញ្ញា ឆ្នាំ២០២២ បាននាំយកថវិការសម្រាប់ទ្រទ្រង់សាលា និងយោធាចារ្យ ដែលជាអំណោយឧបត្ថម្ភដ៏ថ្លៃថ្លាសម្រាប់ខែកញ្ញា ឆ្នាំ២០២២ ឯកឧត្តម ឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការកងទ័ពជើងគោក និងលោកជំទាវ ជូនសាលាពលទាហានទី៤ យោធភូមិភាគទី៤ កងទ័ពជើងគោក ដែលស្ថិតក្នុងខេត្តសៀមរាប ។

ឧត្តមសេនីយ៍ត្រី ជុយ សីហា បានលើកឡើងពីការយកចិត្តទុកដាក់ខ្ពស់ របស់ឯកឧត្តម បណ្ឌិត ចំពោះយោធាចារ្យ បុគ្គលិកសាលាទាំងអស់ ដែលជាថ្នាលបណ្តុះបណ្តាលធនធានមនុស្ស នៃកងយោធពលខេមរភូមិន្ទ និងបានផ្តាំផ្ញេីសួរសុខទុក្ខដល់សិក្ខាកាមដែលកំពុងសិក្សានៅក្នុងសាលាផងដែរ ។ យោធាចារ្យ និងបុគ្គលិកសាលាទាំងអស់ មានសេចក្តីរីករាយ ប្តេជ្ញាអនុវត្តភារកិច្ចឲ្យបានល្អ និងប្រកាសគាំទ្របេក្ខភាព ឯកឧត្តម បណ្ឌិត ជានាយករដ្ឋមន្ត្រីនាពេលខាងមុខ ។

ឧត្ដមសេនីយ៍ត្រី ឈឹង សារុន នាយកសាលាពលទាហានទី៤ ព្រមទាំងនាយទាហាន នាយទាហានរង និងពលទាហាន នៃសាលាពលទាហានទី៤ សូមថ្លែងអំណរគុណយ៉ាងជ្រាលជ្រៅ ជូនចំពោះឯកឧត្តម មេបញ្ជាការ កងទ័ពជើងគោក និងលោកជំទាវ ដែលជានិច្ចជាកាលតែងបារម្ភអំពីសុខុមាលភាពរបស់យោធិនបម្រើដល់ថ្នាលបណ្តុះបណ្តាលធនធានមនុស្ស នៃកងយោធពលខេមរភូមិន្ទ ហើយជាកិច្ចតបស្នង យោធិនគ្រប់រូបប្តេជ្ញាបន្តខិតខំយកចិត្តទុកដាក់បំពេញតួនាទីភារកិច្ចថ្នាក់លើដាកចុះ ៕