ទេសរដ្ឋមន្ដ្រី អូស្មាន ហាស្សាន់ អញ្ជើញធ្វើដំណើរទៅចូលរួមសន្និសីទអន្តរជាតិដែលរៀបចំដោយប្រទេសសិង្ហបុរី

ភ្នំពេញ៖ ឯកឧត្តមបណ្ឌិត អូស្មាន ហាស្សាន់ ទេសរដ្ឋមន្ដ្រីទទួលបន្ទុកបេសកកម្មពិសេស នៅព្រឹកថ្ងៃទី៩ ខែកញ្ញា ឆ្នាំ២០២២ បានអញ្ជើញធ្វើដំណើរទៅចូលរួមសន្និសីទអន្តរជាតិស្តីពី “សហគមន៍ជោគជ័យ” ក្រោមអធិបតីភាពលោក Lee Hsien Loong នាយករដ្ឋមន្ត្រីនៃប្រទេសសិង្ហបុរី ដែលសន្និសីទនេះរៀបចំដោយ ក្រុមប្រឹក្សាសាសនាឥស្លាមសិង្ហបុរី (MUIS) និងមានរយៈពេលបីថ្ងៃ ចាប់ពីថ្ងៃទី ៩ រហូតដល់ថ្ងៃទី១១ ខែកញ្ញា ឆ្នាំ២០២២ នៅប្រទេសសិង្ហបុរីផ្ទាល់។

សន្និសីទនេះផងដែរ នឹងមានការអញ្ជើញចូលរួមពីរដ្ឋមន្ត្រីសាសនាឥស្លាមរបស់ប្រទេសអាស៊ាន ថ្នាក់ដឹកនាំសហគមន៍ឥស្លាម អ្នកនយោបាយ និងសាសនាវិទូជាច្រើនរូប ដើម្បីពិភាក្សាអំពីឧត្តម្មានុវត្តន៍ និងគំរូនៃសហគមន៍មូស្លីម ក្នុងការពូនជ្រំសហគមន៍ជោគជ័យ ក្នុងបរិបទសម្បូរបែប និងទាន់សម័យកាល ដែលស្តែងចេញនូវអត្តចរិតល្អ សមត្ថភាព និងសញ្ជាតិ។

ម្យ៉ាងវិញទៀតដើម្បីពង្រីកទំនាក់ទំនាក់ឲ្យកាន់តែប្រសើរឡើងរវាងកម្ពុជា និងសង្ហបុរី ជាពិសេសរវាងក្រុមប្រឹក្សាសាសនាឥស្លាមសិង្ហបុរី ក្នុងកំឡុងពេលស្នាក់នៅសិង្ហបុរី ឯកឧត្តមបណ្ឌិត នឹងជួបពិភាក្សាការងារជាមួយថ្នាក់ដឹកនាំនៃបណ្តាស្ថាប័ន អង្គការមនុស្សធម៌នានា ជាពិសេសផ្សព្វផ្សាយពីគោលនយោបាយរបស់រាជរដ្ឋាភិបាលកម្ពុជា ក្នុងការទប់ស្កាត់ជំងឺកូវីដ-១៩ ការធ្វើឱ្យមានសុខដុមនីយកម្មជាតិសាសន៍ និងសាសនា និងការស្តារសេដ្ឋកិច្ចឡើងវិញក្រោមការដឹកនាំរបស់ប្រមុខរាជ រដ្ឋាភិបាលកម្ពុជាផងដែរ៕