សម្តេចតេជោ៖ ការងាររៀបចំសណ្តាប់ធ្នាប់នៅអង្គរ មិនអាចអង្គុយបក់ផ្សែងទៀតទេ ដែលអាចនាំឱ្យបាត់បង់ ប្រយោជន៍ធំសម្រាប់ជាតិ និងប្រជាជន

ភ្នំពេញ៖ សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានថ្លែងបញ្ជាក់ថា ការងាររៀបចំសណ្តាប់ធ្នាប់នៅអង្គរ មិនអាចអង្គុយបក់ផ្សែងទៀតទេ ដែលអាចនាំឱ្យបាត់បង់ប្រយោជន៍ធំសម្រាប់ជាតិ និងប្រជាជន។

ក្នុងឱកាសអញ្ជើញជួបសំណេះសំណាល ជាមួយប្រជាពលរដ្ឋស្ម័គ្រចិត្ត រើសំណង់ចេញពីតំបន់រមណីយដ្ឋានអង្គរ នាថ្ងៃទី១៣ កញ្ញានេះ សម្ដេចតេជោ ហ៊ុន សែន បានមានប្រសាសន៍ ថ្លែងអំណរគុណប្រជាពលរដ្ឋ ដែលព្រមរុះរើសំណង់ ចេញពីតំបន់រមណីយដ្ឋានអង្គរ និងអរគុណឧបនាយករដ្ឋមន្ត្រី ជា សុផារ៉ា សម្រាប់ការដឹកនាំការងាររុះរើសំណង់ ។

សម្តេចតេជោថ្លែងថា តើសម្តេចឈឺក្បាលធ្វើអ្វី ក្នុងការរៀបចំសណ្តាប់ធ្នាប់ នៅតំបន់រមណីយដ្ឋាន បើមិនមានភាពចាំបាច់ទេនោះ? សម្តេចតេជោថា ព្រះបរមរតនកោដ្ឋ នរោត្តម សីហនុ បានយកព្រះទ័យទុកដាក់ខ្លាំងណាស់ លើតំបន់រមណីយដ្ឋានអង្គរ។

សម្តេចតេជោ ហ៊ុន សែន បានរំលឹកថា ព្រះបរមរតនកោដ្ឋ បានផ្តួចផ្តើមព្រះបញ្ញាញាណដោយផ្ទាល់ ក្នុងការស្នើដាក់តំបន់រមណីយដ្ឋានអង្គរ ក្នុងបញ្ជីសម្បត្តិបេតិកភណ្ឌពិភពលោក ហើយសម្តេចបានបង្ហាញការគាំទ្រទាំងស្រុង។

សម្តេចតេជោបន្តថា នៅពេលនោះ លោក សឺន សាន បានឆ្លៀតឱកាសកេងចំណេញនយោបាយសឹក ដោយស្នើឱ្យដកកងទ័ពទាំងអស់ចេញពីតំបន់អង្គរ។ ប៉ុន្តែសម្តេចបានចង្អុលមុខ និងបដិសេធភ្លាមចំពោះគំនិតរបស់លោក សឺន សាន។

សម្តេចតេជោ ហ៊ុន សែន គូសបញ្ជាក់ថា មានសម្បត្តិបេតកិភណ្ឌពិភពលោកច្រើនណាស់ រួមទាំងនៅប្រទេសអាល្លឺម៉ង់ផង ត្រូវបានដកចេញពីបញ្ជីសម្បត្តិបេតិកភណ្ឌពិភពលោក ព្រោះតែបាត់បង់លក្ខណៈសម្បត្តិកំណត់ដោយអង្គការយូណេស្កូ ៕