តំណាងរាស្ត្រមណ្ឌលរាជធានីភ្នំពេញ អញ្ជើញចូលរួមរាប់បាត្រ ក្នុងពិធីកាន់បិណ្ឌវេនទី៩ នៅវត្តនិរោធរង្សី រាជធានីភ្នំពេញ
ភ្នំពេញ៖ នៅក្នុងឱកាសដែលបងប្អូនប្រជាពលរដ្ឋខ្មែរជាពុទ្ធបរិស័ទនៅទូទាំងប្រទេសដែលគោរពប្រតិបត្តិទំនៀមទម្លាប់ប្រកាន់ភ្ជាប់ប្រពៃណីព្រះពុទ្ធសាសនាហើយតែងតែធ្វើបុណ្យធ្វើទាននៅគ្រប់រដូវកាលនៃពិធីបុណ្យនីមួយៗនោះ សម្រាប់ឱកាសនៃពិធីបុណ្យកាន់បិណ្ឌ បុណ្យភ្ជុំបិណ្ឌឆ្នាំ២០២២ នេះ តំណាងរាស្ត្រមណ្ឌលរាជធានីភ្នំពេញរួមមាន លោកជំទាវ ម៉ក់ វណ្ណស៊ីថា សមាជិកាគណៈកម្មការទី៨ នៃរដ្ឋសភា និងលោកជំទាវ គឹម សុវណ្ណា បានអញ្ជើញចូលរួមក្នុងពិធីបុណ្យកាន់បិណ្ឌវេនទី៩ នៅវត្តនិរោធរង្សី ស្ថិតក្នុងសង្កាត់និរោធ ខណ្ឌច្បារអំពៅ រាជធានីភ្នំពេញ នាព្រឹកថ្ងៃទី១៩ ខែកញ្ញា ឆ្នាំ២០២២។
ក្នុងពិធីកាន់បិណ្ឌវេនទី៩ នាពេលនេះ លោកជំទាវ បាននាំយកនូវទេយ្យវត្ថុ និងបច្ច័យមួយចំនួន ប្រគេនដល់ព្រះសង្ឃគង់ចាំព្រះវស្សានៅវត្តនិរោធរង្សី និងរាប់បាត្រដើម្បីជូនបុណ្យកុសលដល់បងប្អូនប្រជាជនទាំងអស់ ប្រកបដោយសេចក្តីសុខ និងចិត្តជ្រះថ្លាទទួលបុណ្យកុសល និងសូមឧទ្ទិសនូវផលាអានិសង្ឃជូនដល់វិញ្ញាណក្ខន្ធអ្នកស្នេហាជាតិគ្រប់ជំនាន់ ដែលបានបូជាជីវិតដើម្បីជាតិមាតុភូមិ និងប្រជាជនខ្មែរ រួមទាំងជីដូន ជីតា មាតា បិតា ញាតិការទាំង៧សណ្តានសូមអោយវិញាណក្ខន្ធលោកទាំងអស់បានទៅកាន់ទីបរមសុខសុគតិភព ៕
