យោធិនសោធននិវត្តន៍ និងយោធិនពិការ មានគុណបំណាច់ធំធេងចំពោះជាតិ មាតុភូមិ និងប្រជាជន
ភ្នំពេញ៖ នៅថ្ងៃទី១០ ខែមេសា ឆ្នាំ២០២៤ ឧត្តមសេនីយ៍ត្រី ជឹម ប៊ុនអាន មេបញ្ជាការ តំបន់ប្រតិបត្តិការសឹករង បន្ទាយមានជ័យ និង ឯកឧត្តម ឧត្តមសេនីយ៍ កុយ ដោក អតីតមេបញ្ជាការជំនាន់ទី១ (ពីឆ្នាំ១៩៨៨-១៩៨៩) បានអញ្ជើញជាអធិបតីក្នុងពិធីសូត្រមន្តប្រោះព្រំ សូមសេចក្តីសុខចម្រើន ក្នុងឱកាសបុណ្យចូលឆ្នាំថ្មី ប្រពៃណីជាតិខ្មែរ និងសំណេះសំណាលសួរសុខទុក្ខអតីតយោធិនសោធននិវត្តន៍ ពិការ ដែលបានចេញពីជួរទៅរស់នៅតាមមូលដ្ឋាន។
នៅក្នុងពិធីនោះដែរ ឯកឧត្តម ឧត្តមសេនីយ៍ កុយ ដោក អតីតមេបញ្ជាការជំនាន់ទី១ បានមានប្រសាសន៍ថា យោធិននៃតំបន់ប្រតិបត្តិការសឹករងបន្ទាយមានជ័យ គ្រប់ជំនាន់ បានខិតខំពុះពារគ្រប់ឧបសគ្គ ម្នាក់ៗឆ្លងកាត់ប្រយុទ្ធស្ទើរាប់មិនអស់ ខ្លះបាត់បង់ជីវិត ខ្លះពិការដៃ ជើង រហូតមកដល់សព្វថ្ងៃ ប្រទេសមានសុខសន្តិភាព នេះគឺពិតជាបានមកដោយការលះបង់របស់យោធិនយើងគ្រប់ៗ ជំនាន់។
ឧត្តមសេនីយ៍ត្រី មេបញ្ជាការ បានមានប្រសាសន៍ថា ទោះបីបងៗបានចប់តួនាទី និងភារកិច្ចការពារជាតិក្តី ក៏គុណបំណាច់ធំធេងនេះ មនុស្សជំនាន់ក្រោយមិនអាចបំភ្លេចបានឡើយ ព្រោះយោធិនសោធននិវត្តន៍ និងយោធិនពិការ មានគុណបំណាច់ធំធេងចំពោះជាតិ មាតុភូមិ និងសូមបន្តវប្បធម៌ដ៏ល្អរបស់កងយោធពលខេមរភូមិន្ទ ដោយធ្វើខ្លួនឲ្យល្អ និងសម្របរស់នៅជាមួយអាជ្ញាធរមូលដ្ឋាន និងរក្សាបានសណ្តាប់ធ្នាប់សង្គម ចូលរួមជាមួយរាជរដ្ឋាភិបាលដើម្បីកសាងអភិវឌ្ឍជាតិ ក្រោមការដឹកនាំរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និង សូមបងៗ ត្រូវបំពេញកាតព្វកិច្ចជាពលរដ្ឋល្អ។
ជាទីបញ្ចប់ ឧត្តមសេនីយ៍ មេបញ្ជាការ បាននាំយកនូវអំណោយមួយចំនួនចែកជូនយោធិនចូលសោធននិវត្តន៍ យោធិនពិការ ចំនួន ១៦៣នាក់ ក្នុងម្នាក់ៗ ទទួលបានថវិកា ៥០ ០០០រៀល ចំពោះអតីតយោធិនសោធននិវត្តន៍ ពិការ ក្រីក្រ ចំនួន ២០នាក់ ទទួលបានការឧបត្ថម្ភបន្ថែម ក្នុងម្នាក់ៗទទួលបាន អង្ករ ៥០គីឡូក្រាម មី; ត្រីខ; ទឹកស៊ីអ៉ីវ; ទឹកត្រី៕
