លោកជំទាវ ញ៉ែម សាខន ស ខេង អញ្ជើញជាអធិបតីភាព ពិធីបុណ្យប្រគេនទៀនព្រះវស្សាចំនួន ៣៣វត្ត ក្នុងខេត្តបាត់ដំបង
ភ្នំពេញ៖ លោកជំទាវ ញ៉ែម សាខន ស ខេង ភរិយារបស់សម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ នាព្រឹកថ្ងៃទី១០ ខែកក្កដា ឆ្នាំ២០២២ បានអញ្ជើញជាអធិបតីភាព ក្នុងពិធីបុណ្យ ប្រគេនទៀនចំណាំព្រះវស្សា ទេយ្យទាន និងបច្ច័យដល់ព្រះសង្ឃចំនួន ៣៣វត្ត ក្នុងខេត្តបាត់ដំបង ដើម្បីឧទ្ទិសកុសលផលបុណ្យជូនដល់មាតា បិតា ជីដូន ជីតា ញាតិការទាំងប្រាំពីរសណ្តាន ដែលបានចែកឋានទៅកាន់លោកខាងមុខ។
ពិធីនេះមានការចូលរួមពីសំណាក់ឯកឧត្តម សុខ លូ អភិបាល នៃគណៈអភិបាលខេត្តបាត់ដំបង និងថ្នាក់ដឹកនាំ មន្រ្តីរាជការនានាជុំវិញខេត្ត ដែលប្រារព្វធ្វើឡើងនៅទីស្នាក់ការ សហភាពសហម័្ពន្ធយុវជនកម្ពុជា ខេត្តបាត់ដំបង។
សូមបញ្ជាក់ថា ទេយ្យទានដែលត្រូវប្រគេនជូនព្រះសង្ឃទាំង៣៣ វត្ត ដោយវត្តនីមួយៗទទួលបានទៀន ចំណាំព្រះវស្សា១គូរ សាដក១ អង្ករ១០០គីឡូក្រាម មី៥កេស ត្រីខ១កេសធំ ទឹកក្រូច៣កេស ទឹកសុទ្ធ២កេស ទឹកដោះគោខាប់១កេស ទឹកត្រី ស៊ីអ៉ីវ៤យួរ សៀង២ធុង ប្រេងឆា២ធុង ស្ករស២៥គីឡូក្រាម អំបិល១០កញ្ចប់ ប៊ីចេង២គីឡូក្រាម និងថវិកាមួយចំនួន។
សូមរំលឹកផងដែរថា ដើម្បីគោរពតាមទំនៀមទម្លាប់ប្រពៃណីព្រះពុទ្ធសាសនា ពិធីបុណ្យចូលព្រះវស្សា នេះមានរយៈពេល៣ខែ ដោយចាប់ផ្តើមពីថ្ងៃ១រោច ខែអាសាឍ ហើយបញ្ចប់វិញ នៅថ្ងៃទី១៥រោច ខែកត្តិក។
ក្នុងអំឡុងបុណ្យចូលព្រះវស្សានេះ តាមព្រះវិន័យបានកំណត់ថាព្រះសង្ឃមិនអាចនិមន្ត ចេញទៅ បិណ្ឌបាត្រនៅខាងក្រៅបានឡើយ ដោយគង់នៅក្នុងទីអារាមរហូត ដូច្នេះទើបប្រជាពលរដ្ឋ ពុទ្ធបរិស័ទនាំគ្នាយកទៀនព្រះវស្សា និងទេយ្យវត្ថុទៅប្រគេនព្រះសង្ឃ ដើម្បីគង់ចាំព្រះវស្សាអស់ ត្រីមាសតកូនតចៅរហូតមកដល់បច្ចុប្បន្ន៕