ឧត្ដមសេនីយ៍ទោ សោម ស៊ុន ផ្សព្វផ្សាយសភាពការណ៍ថ្មីៗ និងប្រគល់ភារកិច្ចជូនកងកម្លាំង បន្តទៅបម្រើប្រជាជនដែលរងផលប៉ះពាល់ដោយគ្រោះទឹកជំនន់ ក្នុងខេត្តកំពង់ធំ
ភ្នំពេញ៖ នៅទីបញ្ជាការតំបន់ប្រតិបត្តិការសឹករងកំពង់ធំ ស្ថិតនៅភូមិថ្នល់បែក ឃុំត្រពាំងឬស្សី ស្រុកកំពង់ស្វាយ ខេត្តកំពង់ធំ នៅថ្ងៃទី២៤ ខែតុលា ឆ្នាំ២០២២ បានបើកកិច្ចប្រជុំផ្សព្វផ្សាយសភាពការណ៍ថ្មីៗ និងប្រគល់ភារកិច្ចជូនកងកម្លាំងចំណុះទីបញ្ជាការតំបន់ប្រតិបត្តិការសឹករងកំពង់ធំ ដើម្បីបន្តសកម្មភាពទៅបម្រើប្រជាជនដែលកំពុងរងផលប៉ះពាល់ដោយគ្រោះទឹកជំនន់ ដែលពិធីនេះប្រព្រឹត្តទៅក្រោមអធិបតីភាពឧត្ដមសេនីយ៍ទោសោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ ។
ឧត្ដមសេនីយ៍ទោ សោម ស៊ុន បានប្រកាសញាតិថ្កោលទោស យ៉ាងដាច់អហង្ការ របស់នាយទាហាន នាយទាហានរង និងពលទាហាន ទាំងអស់ចំណុះបញ្ជាការដ្ឋានតំបន់ប្រតិបត្តិការសឹករងកំពង់ធំ ដែលប្រឆាំងដាច់ខាតនូវត្រកូលជនក្បត់ជាតិ៣ ជំនាន់ និងប្តេជ្ញាចិត្តកំចាត់ចោលជនជនក្បត់ជាតិសម រង្សី និងបក្សពួកដែលមានគោលបំណងធ្វើបដិវត្តពណ៌ បំផុសបំផុស បង្កចលាចលក្នុងសង្គម និងមានចេតនាបំផ្លាញសន្តិភាព ស្ថេរភាពសង្គម ដែលយើងរកបានដោយលំបាកបំផុត ដូច្នេះយើងទាំងអស់គ្នាសូមប្តេជ្ញាចិត្តដាច់ខាត ការពាររដ្ឋធម្មនុញ្ញ ការពារព្រះមហាក្សត្រ ការពាររាជរដ្ឋាភិបាលស្របច្បាប់ ដែលកើតចេញពីការបោះឆ្នោត និងការពារឲ្យបានដាច់ខាតនូវសុខសន្តិភាពជូនប្រជាជន ទោះបីជាក្នុងតម្លៃណាក៍ដោយ។
នៅក្នុងឱកាសនេះ ឧត្តមសេនីយ៍ទោ សោម ស៊ុន បានប្រគល់ភារកិច្ចជូននាយទាហាន នាយទាហានរង និងពលទាហានទាំងអស់ ត្រូវបន្តទៅបម្រើប្រជាជន ដែលកំពុងរងផលប៉ះពាល់ដោយគ្រោះទឹកជំនន់ក្នុងរយៈពេលកន្លងមកនេះ ដោយត្រូវចាត់តាំងប្រើប្រាស់កងកម្លាំងដឹកជញ្ជូនគ្រឿងឧបភោគបរិភោគ ដែលប្រមុខរាជរដ្ឋាភិបាលសម្តេចតេជោ ហ៊ុន សែន ផ្តល់ជូន ដោះស្រាយការលំបាកចំពោះមុខ ហើយនិងបន្តដឹកជញ្ជូនរៀបចំស្រូវពូជជូនប្រជាជនដើម្បីបង្ករបង្កើងផលស្រូវនៅក្នុងរដូវទឹកសម្រកខាងមុខនេះឲ្យទាន់ពេលវេលា ៕
