ឯកឧត្តម ហង់ជួន ណារ៉ុន ដឹកនាំកិច្ចប្រជុំកំពូល ស្តីពីបរិវត្តកម្មប្រព័ន្ធអប់រំ នៅទីស្នាក់ការអង្គការសហប្រជាជាតិ
ភ្នំពេញ៖ ឯកឧត្តមបណ្ឌិតសភាចារ្យ ហង់ជួន ណារ៉ុន រដ្ឋមន្រ្តីក្រសួងអប់រំ យុវជន និងកីឡា បានដឹកនាំគណៈប្រតិភូក្រសួងអប់រំ យុវជន និងកីឡាចូលរួមកិច្ចប្រជុំកំពូលស្តីពីបរិវត្តកម្មប្រព័ន្ធអប់រំ ក្រោមប្រធានបទ ការលើកកម្ពស់មូលដ្ឋានគ្រឹះ នៃការរៀនសូត្រតាមរយៈការប្រែក្លាយ ពីវិបត្តិទៅជាសកម្មភាពអនុវត្ត។
ក្នុងកិច្ចប្រជុំកំពូលនេះ ឯកឧត្តមបណ្ឌិតសភាចារ្យរដ្ឋមន្រ្តី បានធ្វើបទអន្តរាគមន៍ដោយផ្តោតលើក្របខណ្ឌគោលនយោបាយ និងសកម្មភាពអាទិភាពរយៈពេលខ្លី មធ្យម និងវែង ក្នុងការស្តារការរៀនសូត្រឡើងវិញ និងការធ្វើបរិវត្តកម្មប្រព័ន្ធអប់រំ ដើម្បីលើកកម្ពស់មូលដ្ឋានគ្រឹះនៃការរៀនសូត្រ។
សកម្មភាពអាទិភាពសម្រាប់រយៈពេលខ្លី រួមមាន៖ ការអនុវត្តការវាយតម្លៃការសិក្សារបស់សិស្ស ការអភិវឌ្ឍសមត្ថភាពនាយកសាលារៀន និងគ្រូបង្រៀនក្នុងការបំប៉នសិស្សរៀនយឺត ការបង្រៀនអំណាន និងគណិតវិទ្យាថ្នាក់ដំបូង ការបង្កើតបរិស្ថានសិក្សាសុវត្ថិភាព ការលើកកម្ពស់សុខភាពសិក្សា និងអនាម័យ ការផ្តល់អាហារតាមសាលារៀន ការផ្តល់អំណាចដល់សហគមន៍ក្នុងការគ្រប់គ្រងសាលារៀន។
សកម្មភាពសម្រាប់រយៈពេលមធ្យម និងរយៈវែងរួមមាន៖ ការធ្វើកំណែទម្រង់សាលារៀន ការគាំពារ និងអភិវឌ្ឍកុមារតូច ការអប់រំឌីជីថល និងការលើកកម្ពស់គុណភាពគ្រូបង្រៀន។